सन्दर्भ टुडे 
फागुन १२: आज विरोध प्रदर्शन हुनसक्ने भन्दै संसद् भवन नयाँ बानेश्वर आसपासका क्षेत्रमा सुरक्षा व्यवस्था कडा पारिएको छ ।
एमसीसीको विरोधमा नयाँ बानेश्वर आसपासका क्षेत्रमा हरेक दिनजसो विरोध प्रदर्शन हुन थालेपछि संसद् भवन आसपास सुरक्षा सतर्कता बढाइएको प्रहरीले जनाएको छ ।
संसद् बैठकमा एमसीसी टेबल भएको दिन गएको आइतवार प्रदर्शनकारी र प्रहरीबीच झडप भएपछि सुरक्षा व्यवस्था थप कडा पारिएको हो । आज दिउँसो १ बजे बस्ने संसद् बैठकमा एमसीसीमाथि छलफल गर्ने कार्यसूची छ ।
सुरक्षाका लागि संसद् भवनको मूल सडकसँगै रहेको पर्खालमा काँडेतार लगाइएको छ । प्रदर्शनकारी र प्रहरीबीच हुन सक्ने सम्भावित झडपलाई ध्यान दिएर पर्खाललाई तारले घेरिएको हो ।
एमसिसी संसदमा टेबल भएपछि सत्तारुढ दल नेकपा माओवादी केन्द्र,वैज्ञानिक समाजवादी पार्टी नेपाल ,नेकपा एकीकृत समाजवादी पार्टी, जनमोर्चा लगायतका भातृ संगठन आन्दोलनमा उत्रिएका छन् ।
उनीहरुले आजबाट आन्दोलन अझै चर्काउने घोषणा गरेका छन् । यस्तै नेत्र विक्रम चन्द नेतृत्वको नेकपा सहित ६ वटा दलले पनि आन्दोलन गर्दै आएका छन् ।
