सन्दर्भ टुडे 
म्याग्दी, १२ माघ । म्याग्दीको बेनी नगरपालिका–३ भकिम्लीमा क्यान्सरबाट थलिएकी एक जना बिरामीको उपचारका लागि रु सात लाख भन्दा बढी सहयोग प्राप्त भएको छ । भकिम्लीको ज्यामीरेकी ५७ वर्षीया हरिकला छन्त्यालको उपचारका लागि स्थानीय हिमचुली स्र्पाेट्स क्लबको नेतत्वमा रु सात लाख ५८ हजार पाँच सय ९३ सहयोग जुटेको हो ।
स्वदेश तथा विदेशमा रहेकाबाट सङ्कलन भएको उक्त रकम पाठेघर र फोक्सोको क्यान्सरबाट थलिएकी छन्त्याललाई उपचारका लागि उपलब्ध गराएको क्लबका अध्यक्ष दीपक पुनले जानकारी दिनुभयो । बालप्रिय सारदा आधारभूत विद्यालयमा आयोजना भएको कार्यक्रममा वडा सदस्य द्रोपती छन्त्याल, प्रअ जमुना राना र क्लबका अध्यक्ष पुन लगायतले हरिकलाका श्रीमान् हर्कबहादुरलाई नगद हस्तान्तरण गर्नुभएको थियो । छन्त्यालको चितवनमा रहेको बिपी कोइराला स्मृति क्यान्सर अस्पतालमा उपचार भइरहेको छ ।
सामान्य खेती किसानी गरेर जीविकोपार्जन गर्दै आएकी छन्त्याल बिरामी परेपछि महँगो उपचार खर्च जुटाउन परिवारलाई समस्या भएपछि बेनी नगरपालिका–३ को वडा कार्यालयको सिफारिसमा क्लबले अभियान सञ्चालन गरेको थियो । यसैगरी हिमचुली स्र्पाेट्स क्लबले बालप्रिय सारदा आधारभूत विद्यालयको शैक्षिक क्रियाकलापका लागि रु ५० हजार पनि सहयोग गरेको छ ।
