सन्दर्भ टुडे 
काठमाडौँ, २७ माघ । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले नेकपा देशकै सबैभन्दा नयाँ र जनआकांक्षाबाट जन्मिएको पार्टी भएको दाबी गरेका छन्। उनले पार्टीप्रति फैलाइएका गलत भाष्य र भ्रमलाई चिर्ने गरी जनतामाझ सही सन्देश पुर्याउन पार्टी कार्यकर्तालाई निर्देशन दिएका छन्।
एक कार्यक्रममा सम्बोधन गर्दै अध्यक्ष दाहालले नेकपाबारे पुरानो, असफल वा परिवर्तनविरोधी पार्टी भन्ने धारणा फैलाउने प्रयास भइरहेको उल्लेख गरे। उनले ती सबै भाष्य गलत भएको भन्दै नेकपा परिवर्तन, संघर्ष र जनताको अपेक्षाबाट विकसित हुँदै आएको नयाँ पार्टी भएको बताए। “नेकपा जनताको बलिदान, संघर्ष र परिवर्तनको प्रक्रियाबाट निर्माण भएको पार्टी हो। यसलाई नयाँ सोच, नयाँ दृष्टि र नयाँ प्रतिबद्धतासहित अघि बढाइएको छ,” उनले भने।
प्रचण्डले पार्टी कार्यकर्तालाई वैचारिक रूपमा स्पष्ट र संगठित भएर जनतामाझ जान आग्रह गरे। गलत प्रचार र भ्रमको प्रतिवाद तथ्य र व्यवहारबाट गर्नुपर्ने उनको भनाइ थियो। उनले भने, “हामीले जनतासँग संवाद गर्दा पार्टीको इतिहास मात्र होइन, वर्तमान भूमिका र भविष्यको दृष्टिकोण पनि स्पष्ट रूपमा राख्नुपर्छ। नेकपा नयाँ हो भन्ने कुरा जनताले बुझ्नुपर्छ।”
आगामी निर्वाचनको सन्दर्भमा अध्यक्ष दाहालले नेकपा पहिलो पार्टी बन्ने प्रबल सम्भावना रहेको दाबी गरे। उनले सो सम्भावनालाई वास्तविकतामा बदल्न अहिलेबाटै योजनाबद्ध ढंगले काम गर्नुपर्नेमा जोड दिए। संगठन सुदृढीकरण, जनसम्पर्क विस्तार र जनजीविकासँग सम्बन्धित मुद्दालाई प्राथमिकतामा राखेर अघि बढ्न उनले कार्यकर्तालाई सुझाव दिए।
उनका अनुसार जनताको विश्वास जित्न पार्टीले आफ्नो व्यवहार, नीति र कार्यक्रममार्फत स्पष्ट सन्देश दिन आवश्यक छ। “निर्वाचन जित्ने वा हार्ने कुरा मात्र मुख्य होइन, जनताको भरोसा जित्नु नै सबैभन्दा ठूलो जित हो,” उनले भने।
अध्यक्ष दाहालले पार्टीभित्र एकता, अनुशासन र सामूहिक नेतृत्वलाई मजबुत बनाउँदै लोकतान्त्रिक अभ्यासलाई थप सुदृढ गर्ने प्रतिबद्धता पनि व्यक्त गरे। उनले कार्यकर्तालाई आत्मविश्वासका साथ जनतामाझ गएर नेकपाको नीति, कार्यक्रम र दृष्टिकोण प्रस्तुत गर्न आग्रह गर्दै आगामी निर्वाचनलाई परिवर्तनको अर्को अवसरका रूपमा लिनुपर्ने बताए।
