सन्दर्भ टुडे 
टर्कीले २४ वर्ष लामो प्रतीक्षा अन्त्य गर्दै फिफा विश्वकप २०२६ मा आफ्नो स्थान सुरक्षित गरेको छ। कोसोभो विरुद्धको निर्णायक प्ले-अफ खेलमा १–० को कठिन जित निकाल्दै टर्कीले सन् २००२ पछि पहिलो पटक विश्वकप खेल्ने अवसर पाएको हो।
सन् २००२ को विश्वकपमा तेस्रो स्थान हासिल गरेको टर्की त्यसयताका पाँचवटा छनोट चरणमा असफल रहँदै आएको थियो। अब यसै वर्ष अमेरिका, क्यानडा र मेक्सिकोमा हुने विश्वकपमा टर्की समूह ‘सी’ मा रहनेछ, जहाँ उसले अस्ट्रेलिया, पाराग्वे र आयोजक अमेरिकासँग प्रतिस्पर्धा गर्नेछ।
प्रिस्टिनामा भएको तनावपूर्ण खेलको ५३ औं मिनेटमा केरेम अकतुरकोग्लुले निर्णायक गोल गरे। केनान यिल्दिजको पासमा ओर्कुन कोकुको प्रहार सही दिशामा नजाँदा त्यसलाई सदुपयोग गर्दै फेनरबाचेका स्ट्राइकर अकतुरकोग्लुले पोस्टको नजिकैबाट जाली चुमाएका थिए।
पहिलो हाफमा कोसोभोले अग्रता लिने सुन्दर मौका गुमाएको थियो। कोसोभोका फिसनिक अस्लानीको प्रहार टर्कीका गोलकिपर उगुरकान साकिरले बचाउँदै बल बारमा ठोक्किएर बाहिरिएको थियो। खेलभरि टर्कीले खासै आक्रामक खेल देखाउन नसके पनि अकतुरकोग्लुको त्यही एक गोल विश्वकप पुग्न पर्याप्त बन्यो।
