सन्दर्भ टुडे 
सान्छी संघका प्रतिनिधि वु चाउले पोखरालाई नेपालको पर्यटन रत्नको रूपमा सम्मान गर्दै आएको बताए । ‘चीन र नेपालबीच जलवायु परिवर्तनको सामना गर्ने र हरित विकास प्रवर्द्धन गर्ने साझा दृष्टिकोण छ,’ उनले भने, ‘हामी पोखराको स्थानीय परिवेशसँग मेल खाने गरी चीनका सफल प्रविधि र अनुभवहरू यहाँ ल्याउन उत्साहित छौं ।’
उनका अनुसार सन् २०२४ मा स्थापित सान्छी संघमा १ सय ५० भन्दा बढी सदस्य संस्था आबद्ध छन् । ऊर्जा, वातावरण संरक्षण र उच्चस्तरीय उत्पादन क्षेत्रका अग्रणी उद्योग तथा वैज्ञानिक अनुसन्धान संस्थाहरू समेटिएको यो संघले कार्बन तटस्थता नीति अनुसन्धान, हरित वित्त र अन्तर्राष्ट्रिय आदानप्रदानमा अनुभव बोकेको छ ।
नेपाल पर्यटन बोर्ड गण्डकी प्रदेश कार्यालय पोखराका प्रमुख मणिराज लामिछानेले यो साझेदारी नेपालको हरित पर्यटन नीतिसँग मेल खाएको भन्दै स्वागत गरे । उनले थपे, ‘कार्बन न्युट्रल पर्यटनको अवधारणामा यो साझेदारीले ठोस टेवा पुर्याउनेछ । अन्तर्राष्ट्रिय संस्थाको प्रविधि र लगानी भित्र्याउनु हाम्रो साझा प्राथमिकता हो ।’
परिषद्का महासचिव जीवनराज सापकोटाले यो सम्बन्ध स्थापना दुई संस्थाबीच लामो छलफल र समन्वयको सफल परिणति भएको बताए । ‘यो मात्र एउटा पत्र आदान–प्रदान होइन, यो पोखराको हरित भविष्यको जग हो,’ उनले भने, ‘हामी अब ठोस कार्ययोजना बनाएर वास्तविक काम थाल्छौं ।’
