सन्दर्भ टुडे 
पोखरामा लोपोन्मुख लाखेनाच संरक्षणको प्रयास गरिएको छ। मालेपाटन ताया:मचा नाच समिति पोखरा-५ ले नेवारी समुदायको अनुपम संस्कृति लाखेनाच संरक्षणको प्रयास गरेको हो।
नेवा:खल कास्कीको संरक्षणमा लाखेनाच संरक्षण, संवर्द्धन र पुस्तान्तरणको प्रयास स्वरूप शनिबार पोखरा-५ मालेपाटनस्थित वाराही माविको खेल मैदानमा तेस्रो संस्करणको लाखेनाच प्रदर्शन सम्पन्न भएको छ।
पोखरामा लाखेनाच लोपोन्मुख अवस्थामा पुगेपछि नयाँ पुस्तामा लाखेनाचप्रति आकर्षण जगाउन तीन वर्षअघि सुरु भएको लाखेनाच प्रदर्शन यस वर्ष पनि भव्य रूपमा भएको हो। जहाँ एउटै मञ्चमा कास्कीसहित तनहुँ, बागलुङ र पर्वतका २० वटा लाखेनाच समूहले प्रस्तुति दिएको कार्यक्रम संयोजक विनय श्रेष्ठले जानकारी दिए। उनका अनुसार मालेपाटन ताया: मचा समितिले नाचको सुरुवात गरेपछि नेवार कल्याण समाज पर्वत, नेपाल राष्ट्रिय खड्गी समाज पोखरा-२, बागलुङको नारायणस्थान हटिया समाज, पोखरा-६ स्थित बैदाम नेवा: खल, जाल्पा देवी ल्याम्ह पुच: सिमलचौर पोखरा, हेमजा नेवा खल पोखरा-२५, चण्डेश्वरी नेवा समाज पोखरा-१४ को प्रस्तुति दिएका थिए। त्यस्तै रानीपौवा रामबजार ताया: मचा समिति, रानीपौवा खड्गी समाज, रातोपैह्रा लाखे खल पाखरा-१४, कुँडहर राधाकृष्ण मन्दिर पोखरा-१३, राष्ट्र बैंक चोक ड्यामसाइड नेवा खल, पृथ्वी चोक ल्याम्ह पुच:, जोजोलपा लाखे, तेर्सापट्टी यमलोकको लाखे, मोहरिया सिंहनाथ टोल ताया: मचा समिति पोखरा-१, गैह्रापाटन नेवा समाज पोखरा-४, नयाँ बजार ल्याम्ह पुच: पोखरा-९ र नव पञ्चाली लाखे समूह पोखरा-२ लगायतको प्रस्तुति रहेको थियो।
अप्रतियोगितात्मक कार्यक्रम बिसौं हजार दर्शकको माझमा भएको थियो। जहाँ पानीको प्रवाह नगरी दर्शकले नाच अवलोकन गरेका थिए। बिहान १० बजेदेखि सुरु भएको प्रदर्शन राती १० बजेसम्म पनि जारी रहँदा पनि दर्शकहरू मन्त्रमुग्ध भएर हेरिरहे। जसले आयोजकलाई आगामी दिनमासमेत कार्यक्रम गर्न हौसला मिलेको संयोजक श्रेष्ठको भनाई छ।
