सन्दर्भ टुडे 
काठमाडौं। नेपाली महिला राष्ट्रिय क्रिकेट टोलीले रुवाण्डालाई हराएको छ। रुवाण्डास्थित गहन्गा क्रिकेट स्टेडियममा सम्पन्न खेलमा नेपालले घरेलु टोलीमाथि ३८ रनको जित निकालेको हो।
टस जितेर ब्याटिङमा उत्रिएको नेपालले निर्धारित २० ओभरमा ७ विकेट गुमाउँदै १०३ रन बनाएको थियो। यसक्रममा कप्तान इन्दु वर्माले सर्वाधिक ३३ रन बनाउँदा कविता कुँवरले २४ तथा रचना चौधरीले ११ रनको योगदान दिए। बलिङमा रुवाण्डाका हेन्रिएट इशिम्वेले सर्वाधिक ३ विकेट लिँदा मारी बिमेन्यिमानाले २ तथा बेलिस मुरेकातेते र रोजिन इरेरा १ विकेट लिए।
जवाफी ब्याटिङमा उत्रिएको घरेलु टोली १७.४ ओभरमा अलआउट हुँदै ६५ रनमा समेटियो। यसक्रममा मारी बिमेन्यिमानाले १९ तथा जियोभानिस उवासेले १२ रन बनाए। बलिङमा नेपालका लागि मनिषा उपाध्यायले सर्वाधिक ३ विकेट लिँदा कविता कुँवर, रचना चौधरी र रिया शर्माले समान २ विकेट लिए।
पाँच टोली सहभागी लिगमा नेपालले छ खेल खेल्दा रुवान्डालाई दुई पटक र इटलीलाई एकपटक हराउँदा अमेरिकासँग दुई पटक र भानुआतुसँग एकपटक पराजित भएको छ।
