सन्दर्भ टुडे 
बुटवल । भिजन लुम्बिनी लिमिटेडले पाल्पाको तिनाउ खोलामा ३।४४ मेगावाट क्षमताको ‘नमः बुद्ध हाइड्रोपावर’ आयोजना निर्माण गर्ने भएको छ। कम्पनीले बुटवलमा पत्रकार सम्मेलन गर्दै तिनाउ गाउँपालिका–झुम्सामा करिब ७० करोड रुपैयाँ लागतमा आयोजना निर्माण गरिने जनाएको हो। आयोजना १५ महिनाभित्र सम्पन्न गरी सञ्चालनमा ल्याउने लक्ष्य राखिएको छ।
भिजन लुम्बिनीका अध्यक्ष जगतहादुर पोखरेलले लुम्बिनी विकास बैंकसँग सम्झौता गरेर स्रोत सुनिश्चितता लगायतका काम अघि बढिसकेको जानकारी दिए। उनले सामूहिक लगानी नै समृद्धिको आधार भएको उल्लेख गर्दै तिनाउमा आयोजना निर्माण त्यसैको उदाहरण भएको बताए।
उनका अनुसार आयोजनाको प्राविधिक, वातावरणीय तथा पर्यावरणीय अध्ययनसम्बन्धी काम सम्पन्न भइसकेको छ। यसअघि कम्पनीले कास्कीमा २५ मेगावाटको जलविद्युत आयोजना निर्माण गरी सञ्चालनमा ल्याइसकेको छ।
कम्पनीले हाल देशभर १२ वटा ठुला परियोजनामा लगानी गर्दै काम गरिरहेको जनाएको छ। अध्यक्ष पोखरेलले आगामी दिनमा पर्यटन क्षेत्रमा समेत लगानी विस्तार गर्ने र ‘भिजन लुम्बिनी’लाई ‘भिजन नेपाल’का रूपमा विकास गर्ने योजना रहेको बताए।
सञ्चालन समिति सदस्य अनुमान शैजुले बुटवलबाट सुरु भएको कम्पनीले बुटवलसँगै जोडिएको तिनाउ क्षेत्रमा आयोजना अघि बढाउनु सकारात्मक कदम भएको बताए। अर्का सदस्य कुलबहादुर केसीले डाक्टर, इन्जिनियरदेखि अवकाशप्राप्त व्यक्तिसम्मको सामूहिक लगानीले कम्पनीलाई अघि बढाएको बताए।
भिजन लुम्बिनीले जलविद्युतसँगै हस्पिटालिटी, बीमा र आईटी क्षेत्र लगायत विभिन्न क्षेत्रमा लगानी गर्दै आफ्ना गतिविधि विस्तार गरिरहेको जनाएको छ।
बोर्ड सदस्य तथा कार्यकारी राजीव गौतमले महाकाली र कर्णाली क्षेत्रमा समेत ठुला जलविद्युत आयोजना अघि बढाउने तयारी भइरहेको बताए। साना–साना लगानीकर्तालाई समेटेर कम्पनी स्थापना गरिएको उनले उल्लेख गरे।
