सन्दर्भ टुडे 
असार २१: फोहोर व्यवस्थापन यतिबेला काठमाडौँ उपत्यकाको मात्र नभएर देशका विभिन्न स्थानमा निकै नै चुनौती बनिरहेको छ । ठूला–ठूला बस्तीमा यस्ता चुनौती प्राय: देखिरहन्छन् । काठमाडौँ महानगरपालिका यसको सबैभन्दा ठूलो उदाहरण हो । त्यसैले त पछिल्लो समय महानगरले कुहिने र नकुहिने फोहोर छुट्याउन थालेको छ ।
कुहिने फोहोरलाई मल बनाउन सकिन्छ, यो सबैलाई थाहा भएकै कुरा हो । तर नकुहिने फोहोरबाट पनि राम्रो आम्दानी गर्न सकिन्छ भन्दा त्यती पत्यार नलाग्ला । हो, विशेष गरी हामीले लगाएर फाल्ने अवस्थामा पुगेका कपडाहरु,जो लगाउन नमिल्ने अवस्थामा फाटेका हुन्छन् ती कपडाहरुबाट निकै राम्रो सामाग्रीहरु उत्पादन गर्न सकिन्छ ।
ट्रयास टू क्यास भन्ने नयाँ अवधारणा अनुसार महिला उद्यमी जानकी प्रधान श्रेष्ठले फाटेका कपडाहरुबाट विभिन्न किसिमका फेन्सी चप्पलहरु बनाउनका लागि महिलाहरुलाई तालिम दिदै आउनु भएको छ । पुराना कपडाहरुबाट फेन्सी चप्पलहरुमात्र हैन, जुत्ता, ब्याग जस्ता सामाग्रीहरु पनि बनाउन सकिन्छ ।
यस्तै फोहोर व्यवस्थापनमा नै अर्को चुनौती रहेको प्लाष्टिकको प्रयोगबाट पनि विभिन्न किसिमका आकर्षक सामाग्रीहरु बनाउन सकिन्छ । विभिन्न कार्पेट, डोरम्याट जस्ता सामाग्रीहरु बनाएर बिक्री गर्न सकिने प्रधान बताउनु हुन्छ । उहाँले काठमाडौँ उपत्यकासंगै देशका विभिन्न जिल्लामा गएर पुराना सामाग्रीहरुलाई कसरी पुन: प्रयोग गर्ने भन्ने बारे तालिम दिदै आउनु भएको छ । आफुले सिकेको सिपलाई अझ परिस्कृत गर्दै फरक ढंगबाट व्यवहारमा उतार्न सके त्यसले राम्रो प्रतिफल दिने प्रधान बताउँनु हुन्छ ।
ट्रयास टू क्यासबाट महिलाहरुले राम्रो आम्दानी गर्न सफल भएको उहाँको अनुभव छ । वास्तवमै, अवसर हाम्रै वरिपरी छ । ती अवसरहरुलाई आफुले गहन अध्ययन गरेर रचनात्मक रुपमा व्यवहारमा उतार्न सके असम्भव भन्ने केही छैन भन्ने गतिले उदाहरण बनेको छ ट्रयास टू क्यास ।
