सन्दर्भ टुडे 
काठमाडौं, २८ भदौ २०८३। नेपाली कांग्रेसले पूर्वसभापति शेरबहादुर देउवा नेतृत्वको अघिल्लो केन्द्रीय समितिमा रहेका नेताहरूलाई नयाँ केन्द्रीय समितिमा सहभागी हुने बाटो खुला गर्ने निर्णय गरेको छ।
आइतबार बसेको कांग्रेस केन्द्रीय कार्यसम्पादन समितिको बैठकले अघिल्लो समितिमा रहेका तर विशेष महाधिवेशनपछि नयाँ समितिमा नरहेका सबैलाई केन्द्रीय समितिमा सहभागी हुन आह्वान गर्ने निर्णय गरेको हो। उनीहरू नयाँ केन्द्रीय समितिमा बसेर आगामी महाधिवेशनको आयोजक समितिका रूपमा काम गर्न सक्नेछन्।
कांग्रेसले १५औँ महाधिवेशन असोज १६ देखि १९ गतेसम्म गर्ने मिति तय गरेको छ। त्यसअघि असोज ३ र ४ गते वडा अधिवेशन गर्ने कार्यक्रम छ।
त्यस्तै, कांग्रेस संस्थापन पक्षले गत पुससम्म सदस्यता नवीकरण गरेका सबै क्रियाशील सदस्यलाई मान्यता दिने निर्णय गरेको समाचारमा उल्लेख छ।
