कमल थापाद्वारा राप्रपा परित्याग गरेको घोषणा

माघ २५ः राष्ट्रिय प्रजातन्त्र पार्टी (राप्रपा) का निवर्तमान अध्यक्ष कमल थापाले पार्टी परित्याग गरेको घोषणा गर्नुभएको छ ।

आज मङ्गलवार हेटौँडामा पत्रकार सम्मेलन गरेर उहाँले राप्रपाबाट अलग भएको घोषणा गर्नुभएको हो ।

पत्रकार सम्मेलनमा बोल्दै उहाँले पार्टीमाथि पटक–पटक निर्मल निवासको हस्तक्षेप हुनु राम्रो नभएको बताउनुभयो ।

नयाँ पार्टी खोल्नेबारे के विचार छ भन्ने पत्रकारको प्रश्नमा थापाले यसबारे सबैसँग सल्लाह गरेर मात्र अगाडि बढ्ने बताउनुभयो ।

गएको मङ्सिरमा भएको अधिवेशनमा अध्यक्ष पदमा राजेन्द्र लिङ्देनसँग पराजित भएपछि कमल थापा पार्टी नेतृत्वप्रति असन्तुष्ट बन्दै आउनुभएको थियो ।

अधिवेशन पछाडि पार्टी संगको सम्बन्ध चिसो रहदै आएको नेता कमल थापाले निर्मल निवासको पटक पटकको हस्तक्षेप खेपिरहनुको विकल्प नभएको संकेत गर्नुभएको छ ।