सन्दर्भ टुडे 
मोरङ, २९ चैतः कोशी प्रदेशका पर्यटन, वन तथा वातावरणमन्त्री भीम पराजुलीले जलवायु परिवर्तनले पुर्याएका असर विश्वमा गम्भीर चुनौतीका रूपमा देखापरेका बताउनुभएको छ ।
शिक्षा दिप कलेज विराटनगर-१० द्वारा आज यहाँ आयोजित चौथो संस्करणको जलवायु सम्मेलनको उद्घाटन गर्दै उहाँले जलवायु परिवर्तनबाट पर्ने असरलाई न्यूनीकरण गर्न तीनै तहका सरकार तथा आमजनताबीच सहकार्य र समन्वय आवश्यक पर्नेमा जोड दिनुभयो ।
विद्यार्थीले अनुसन्धान गरेको विषयलाई प्रदेश सरकारले आफ्नो प्राथमिकतामा पारेर आगामी दिनमा योजना निर्माण गर्ने वनमन्त्री पराजुलीले जानकारी दिनुभयो ।
पूर्वाञ्चल विश्वविद्यालयका उपकुलपति प्राडा विजुकुमार थपलियाले विद्यार्थीले प्रस्तुत गरेको शोधहरू राम्रो अनुसन्धान हुनुका साथै यसले परिवर्तनवाट पर्ने असरलाई न्यूनीकरण गर्ने विश्वास व्यक्त गर्नुभयो ।
मोरङका प्रमुख जिल्ला अधिकारी युवराज कट्टेलले आगामी दिनमा अनुसन्धान कार्यलाई निरन्तरता दिन कलेजलाई आग्रह गर्नुभयो । शिक्षा दीप कलेजका प्राचार्य ज्ञानबहादुर खड्काले जलवायु परिवर्तनले विश्वलाई भयावह अवस्था बनाएको बताउनुभयो ।
कलेजका कक्षा ११ को विज्ञान सङ्कायअन्तर्गत जीव विज्ञान विषयका ४५ विद्यार्थीले १० वटा समूह बनाएर जलवायु परिवर्तनबाट पर्ने नकारात्मक प्रभावका सम्बन्धमा अनुसन्धान प्रस्तुत गरेका थिए । विद्यार्थीद्वारा प्रस्तुत विषयमाथि प्राडा शिवकुमार राई र सहप्राध्यापक कुलप्रसाद लिम्बूले मूल्याङ्कन गर्नुभएको थियो ।
थोरियम समूहले प्रस्तुत गरेको जलवायु परिवर्तनः कृषि र खाद्य सुरक्षासम्बन्धी प्रस्तुति सर्वोत्कृष्ट भएसँगै नगद रु ३० हजार पुरस्कार प्रदान गरिएका कलेजका निर्देशक रामचन्द्र अधिकारीले जानकारी दिनुभयो । —
