सन्दर्भ टुडे 
काठमाडौँ । आईसीसी पुरुष क्रिकेट विश्वकप लिग-२ अन्तर्गत आज ९८ औँ म्याचमा नेपालले घरेलु मैदान कीर्तिपुरमा संयुक्त अरब इमिरेट्स (यूएई) को सामना गर्दैछ। टियु अन्तर्राष्ट्रिय क्रिकेट मैदानमा बिहान ९:३० बजेदेखि सुरु हुने यस खेलमा नेपालले घरेलु दर्शक र मैदानको फाइदा उठाउँदै जित हात पार्ने लक्ष्य राखेको छ।
हाल नेपाल लिग-२ को अंक तालिकामा ७ औँ स्थानमा छ। नेपालले अहिलेसम्मका १८ खेलमध्ये ५ मा जित र १३ मा हार बेहोरेको छ। उता यूएई भने अंक तालिकाको सबैभन्दा पुछारमा छ। यूएईले २० खेलमध्ये ५ मा जित र १५ मा हार सामना गरेको छ। दुवै टोलीका लागि तालिकामा सुधार गर्न आजको जित निकै महत्वपूर्ण हुनेछ।
कीर्तिपुर मैदानको औसत स्कोर पहिलो इनिङ्समा २१५ र दोस्रो इनिङ्समा १९५ रन रहने गरेको छ। नेपालका लागि आरिफ शेख ४६३ रनसहित यस प्रतियोगितामा सर्वाधिक रन बनाउने खेलाडी हुन् भने सन्दीप लामिछाने २३ विकेटका साथ शीर्ष बलरका रूपमा छन्।
नेपालका लागि ओपनर कुशल भुर्तेल अहिले उत्कृष्ट लयमा छन्। हालै यूएई विरुद्धको टी-२० शृङ्खलामा उनले ८४ रनको यादगार इनिङ्स खेलेका थिए। त्यस्तै, सन्दीप लामिछानेको बलिङ भेरिएसन यूएईका ब्याटरहरूका लागि चुनौतीपूर्ण बन्न सक्छ।
उता यूएईका लागि कप्तान मोहम्मद वसिम र अलिशान शराफु मुख्य ब्याटर हुन्। वसिमले यस प्रतियोगितामा ५०१ रन बनाइसकेका छन्। बलिङतर्फ जुनैद सिद्दीकी नेपालका लागि घातक साबित हुन सक्छन्, जसले यसअघि नै २६ विकेट लिइसकेका छन्।
घरेलु मैदान र पछिल्लो समय यूएई विरुद्धको टी-२० शृङ्खलामा पाएको सफलताका कारण आजको खेलमा नेपाललाई बलियो दाबेदार मानिएको छ। लिग-२ को शीर्ष स्थानतर्फ उक्लिनका लागि नेपालका लागि यो खेल निकै निर्णायक हुनेछ।
