सन्दर्भ टुडे 
काठमाडौं । प्रतिनिधिसभाका सभामुख डीपी अर्यालले प्रधानमन्त्री बालेन्द्र शाहलाई संसद्मा उपस्थित भएर सांसदका प्रश्नको जवाफ दिन निर्देशन दिएका छन्। लामो समयदेखि प्रधानमन्त्री संसद्मा उपस्थित नभएको भन्दै विपक्षी दलहरूले विरोध गर्दै आएका बेला सभामुखले प्रतिनिधिसभा नियमावलीअनुसार यस्तो रुलिङ गरेका हुन्।
सभामुख अर्यालले आगामी भदौ १० गते प्रधानमन्त्रीसँग प्रत्यक्ष प्रश्नोत्तर कार्यक्रम राखेका छन्। साथै, जाजरकोट भूकम्प प्रभावित क्षेत्र र धादिङका सन्तोष राईको शव व्यवस्थापनसम्बन्धी विषयमा सम्बन्धित मन्त्रीलाई तीन दिनभित्र संसद्मा जवाफ दिन निर्देशन दिएका छन्।
यसअघि प्रधानमन्त्रीलाई संसद्मा उपस्थित गराउन सभामुखले पटक–पटक अनौपचारिक रूपमा पहल गरे पनि सफलता नपाएको समाचारमा उल्लेख छ। प्रधानमन्त्रीले संसद्मा उठेका कतिपय प्रश्नको जवाफ आफ्ना मन्त्रीमार्फत दिँदै आएका थिए।
सभामुखमाथि सरकारलाई संसद्प्रति जवाफदेही बनाउन नसकेको आरोप लाग्दै आएको थियो। पछिल्लो रुलिङपछि भने संसद्को प्रभावकारिता, मर्यादा र सरकारको जवाफदेहितालाई बलियो बनाउने प्रयासका रूपमा उनको कदमलाई सकारात्मक रूपमा हेरिएको छ। अब प्रधानमन्त्री शाहले सभामुखको निर्देशनअनुसार संसद्मा उपस्थित भएर सांसदका प्रश्नको जवाफ दिन्छन् वा दिँदैनन् भन्ने विषय महत्वपूर्ण बनेको छ।
