सन्दर्भ टुडे 
चैत २३ः चैत १८ र १९ गते एमाले निकट बिद्यार्थी संगठन अनेरास्ववियुको पहिलो केन्द्रिय कमिटिको बैठक सम्पन्न भएको छ । प्रस्तुत कुराकानी सोही बैठकको वरिपरि रहेर अखिल केन्द्रिय कमिटि सदस्य किरण बिक संग गरिएको हो ।
अखिलको पहिलो केन्द्रिय कमिटि बैठक कस्तो रह्यो ?
एकदम सफल रह्यो । जिल्ला जिल्ला बाट कमरेडहरु आएकोले चिनापर्ची र हार्दिकता साटासाट पनि भयो । ४ पटक मेसमै खाना खाएकोले बडो कमरेडली बातावरण भयो । नेता र कार्यकर्ता बिच गहन गहिरो सम्बन्ध भयो ।
मुद्दाको रुपमा कस्तो रह्यो ?
म त्यसमै आउदै थिए । अध्यक्ष कमरेड सुनिता बरालले ऐतिहासिक राजनीतिक दस्ताबेज प्रस्तुत गर्नु भयो । दस्ताबेजले हालको राजनीतिक अवस्थाको व्याख्या गर्दछ भने कसरी निकास तर्फ़ जाने भन्ने बारे पनि बोल्दछ । दस्ताबेज अघिल्लो दिन बाडेर अर्को दिन छलफल तथा सुझावमा गएको थियो । अध्यक्ष कमरेड लेखक पनि भएकोले होला दस्ताबेज गहन थियो । त्यो एउटा मार्गदर्शनको रुपमा रहन्छ पनि । सुझावहरु पनि आएका थिए । अध्यक्ष कमरेडले त्यसको जावाफ दिए संगै त्यो पारित भएको छ । सांगठानिक प्रतिबेदन पनि महासचिव कमरेड समिक बडालले पेस गर्नु भयो । आर्थिक प्रतिबेदन पनि छलफल सहित पास भयो ।
विद्यार्थीका मुद्दामा छलफल भएन ?
भयो नि । विद्यार्थी संगठनको राजनीतिक सांगठानिक प्रतिबेदन भनेको के हो त ? विद्यार्थी मुद्दा त हो । बरु एउटा महत्वपुर्ण कुरा के भने हाम्रो अध्यक्ष कमरेड सुनिता बराल ‘ अनेरास्ववियु हारे पनि स्ववियु चुनाव हुनु पर्छ ‘ भन्नु भयो । मलाइ लाग्छ यो जो कोहिले ओपन फोरममा भन्न सक्ने कुरा होइन । यसै बाट पनि अखिल बिद्यार्थीका मुद्दामा कति संबेदनशील छ भन्ने प्रष्ट छ । उसो त निरन्तर र धेरै जसो ठाउँमा अखिलले नै जित्छ । त्यसकारण आवधिक चुनाव हुनु नै अनेरास्ववियुले जित्नु हो । मुद्दा नै जिते पछि क्याम्पस जित्ने कुरा त स्वभाविक नै हो नि ।
त्यसो भए केले रोकेको छ त स्ववियु चुनाव ?
तत्काल त स्थानिय चुनावले रोकेको छ । यो प्राक्टिकल कुरा हो । सबैको ध्यान यसमै छ । तर पहिले केले रोक्यो ? पहिले पनि नेविसंघको आन्तरिक झगडा र क्रान्तिकारीहरुको आन्तरिक झगडाका कारण रोकिएको हो । यसले उनीहरुलाई नै बढी घाटा भएको छ । स्ववियु जति आवधिक भयो हामी बिद्यार्थी संगठनलाइ फाइदा हुने हो । यसमा सत्तारुढ संगठनले सोच्नु पर्ने कुरा हो । अहिले झन उनीहरु कम्फ़र्टेबल सिचुएसनमा छन गरे हुन्छ नि । हेर्नुस एउटा कुरा के प्रष्ट छ भने कहिले कसको सिट बढी आउला कहिले कसको तर स्ववियु चुनाव सबैलाई फाइदा हुने कुरा हो ।
नजिकै चुनाव रहेकोले अखिलको तयारी के छ ?
सर्टकटमा भन्दा एक बुथ सय विद्यार्थीको निर्देशन आएको छ । त्यसैको तयारीमा छौं । काठमान्डूमा रहेको विद्यार्थीलाई चुनावी एजेन्ट बनाएर पठाउन प्रसिक्षण पनि भैरहेको छ । विद्यार्थीहरु बौद्धिक हुने हुनाले एमालेको एजेण्डाको प्रचार प्रसार रचनात्मक तरिकाले गरिदैछ भने ओली सरकारमा भएका बिकासको कामको बारेमा जनतालाइ बुझाउदै आइएको छ । पाइयो के भने जनता पहिले नै ओली सरकारको काम बारे सुसुचित रहेछन ।
अखिल बाट कोको स्थानिय तहको चुनाव लडलान त ?
एमाले बाट मोर्चा इञ्चार्ज कमरेड भानुभक्त ढकालले सके सम्म स्थानीय तहमा सेट हुन भन्नु भएको छ । धेरै जसो बिद्यार्थी नेताहरु पार्टी राजनीतिमा पनि भएकोले स्थानिय तहमा पनि चुनाव लड्ने अत निश्चितै छ । धेरैको तयारी छ भन्ने सुनेको छु तर ठ्याक्कै खुलेर को को आए थाहा छैन । मैले सरसर्ती हेर्दा अखिल पदाधिकारी लिष्ट बाट कोहि चुनाव लडलान जस्तो चाही देख्दिन ।
अखिलको अध्यक्ष सुनिता बराल पनि स्थानीय तहको चुनाव लड्ने भनेर ओली संग भेटघाट बढाएको चर्चा छ नि ?
हो र तेस्तो पनि हल्ला छ । यो त मैले यहीं मात्र सुने । उसो त स्थानिय तहको अध्यक्ष , उपाध्यक्ष वा मेयर उपमेयरलाइ कम आक्न मिल्दैन । हाल तिनीहरु पनि सरकार हुन संविधान अनुसार । एउटा महत्वपुर्ण संगठनको अध्यक्ष भएकोले उहाँ देश दौडाहामा लाग्नु हुन्छ होला । एमाले अध्यक्ष ओली संग भेट त हुने हुने नै भयो नि । दुवै आ-आफ्नो संगठनको अध्यक्ष हुन । दुबैजना जिल्लाबासी भएकोले कहिले काहीं जिल्लाका कार्यकर्ताको भेट पनि गराइदिनु पर्ने हुन्छ । बिकासका काम र मुद्दा लेर गैराख्न पर्ने हुन्छ ।
मोति कमरेडले भने अनुसार कहिले काहीं सचिवालयले पनि मिलाउन नसकेको भेट कमरेड सुनिता बरालले गराउनु हुन्छ अनि ओली कमरेडले सुनिता कमरेडलाइ विश्वास पनि गर्नु हुन्छ र त्यसै अनुसारको समय पनि दिनु हुन्छ । जहाँ सम्म चुनाव लड्ने कुरा छ कमरेड सुनिता बरालको हाइट त अब सांसद बन्ने नै हो । अखिलको अध्यक्ष पनि सांसद हुने नै चलन छ। त्यसै हुन्छ होला । आखिर एमाले नै ठुलो पार्टी हुदैछ । कमरेड सुनिता बराल राम्रो बक्ता र चर्चित नेता भएकोले कतिपय मोफसलका कार्यक्रममा पार्टीले बोलाएर उहाँ ओली संगै कार्यक्रममा जानुहुन्छ । त्यसैलाई भनेको होला । यो त नियमित सांगठानिक काम हो । टिकेट लिन सुनिता कमरेडले भेट बढाई राख्न पर्दैन ।
